Tuesday, November 20, 2012

ဝမ်းစာဖြည့်ရန်လိုအပ်နေသော အိပ်မက်များ



အိပ်ရေးပျက်ညတွေများလာတော့ အိပ်မက်တွေလည်း ကမောက်ကမ.....

တချို့တ၀က်က ၀မ်းစာမပြည့်ခဲ့ရှာဘူး..........။

 *****************************************************

               လက်ဖက်ရည်ဆိုင်တစ်ဆိုင်ထဲမှာ ကျွန်တော်ရောက်နေတယ် ။

 ဘယ်က ဘယ်လိုရောက်နေရတယ်တော့မသိဘူး ။

 ဒီဆိုင်က ဘယ်မြို့ ဘယ်ရပ်ကွက် က ဘယ်သူ့ဆိုင်မှန်းလဲ မသိဘူး ။

 ကျွန်တော်နဲ့စားပွဲတစ်ဝိုင်းတည်း ရှေ့တည့်တည့်မှာ လူတစ်ယောက် ထိုင်နေတယ် ။

 သူ ဘယ်သူမှန်းလည်း ကျွန်တော်မသိပြန်ဘူး ။ တစ်ခါမှလည်း မမြင်ဖူးဘူးလေ ။

 သူလည်း ကျွန်တော့်ကို သိဟန်မတူပါဘူး ။ စာရွက်တစ်ရွက် ၊ ဘောပင်တစ်ချောင်းနဲ့

 သူ့ဘာသာရေးလိုက်ခြစ်လိုက် ခေါင်းရမ်းလိုက် တစ်ကိုယ်တည်း အလုပ်ရှုပ်နေပုံ ။

အဲ့ဒီလူက မျက်မှန်ထူထူကြီးတပ်ထားတယ် ။ တစ်ဝိုင်းတည်းထိုင်နေပြီး ကျွန်တော့်ကို

ဘာစကားမှလည်းမပြော ။ သူ့ဘာသာမျက်မှောင်ကြီးကုတ်လို့ အခုပဲ ကမ္ဘာကြီးကို

ထ ကယ်တင်လိုက်တော့မယ့်အတိုင်း ။ ဟန်ရေးပြလိုက် စာရွက်ကောက်ခြစ်လိုက်  ။

ဂိုက်စပေါက်အပြည့်ဆိုတာ ဒါမျိုးထင်ပ ။ ထားပါတော့ ။ ဒင်းကတော့ သူ့အာရုံနဲ့သူ အဟုတ် ။

ကျွန်တော့်ခမျာ တော်တော်ကြီး ကမောက်ကမ နိုင်လွန်းနေတယ် ။ တစ်ဆိုင်လုံးက လူတွေက

ကျွန်တော့်ကို သိဟန်မတူဘူး ။ ကျွန်တော်ကလည်း သူတို့ကိုမသိဘူး ။ ရှေ့ကဆရာသမားလို

ရေးခြစ်နေဖို့ ကျပြန်တော့လည်း ကျွန်တော့်မှာ ဘာဆိုဘာမှကို ပါမလာတာ ။

ဆက်ပဲထိုင်နေရမလိုလို ထပဲထွက်သွားရမလိုလို ဘာလုပ်ရမှန်းမသိတာနဲ့

ဘာမှမလုပ်ပဲ အူကြောင်ကြောင်နဲ့ ငုတ်တုတ်ကြီး ဆက်ထိုင်နေမိတယ်။

" ကဗျာဆိုတာကကွာ "

" ဗျာ "

ရှေ့က ဆရာသမားက တစ်ယောက်တည်းပဲ ညည်းသလိုလို၊

ကျွန်တော့်ကိုပဲ လှမ်းပြောသလိုလိုနဲ့ ဘယ့်နှာကြီးမှန်းလဲမသိဘူး ။

တော်တော်စိတ်ပိန်စရာကောင်းလှပါတယ် ။

" ကာရံက အသက်ပဲကွ "

" အော် "

သေချာပြီ ကျွန်တော့်ကိုပြောနေတယ်ဆိုတာ ။

ဒင်းက ကျွန်တော့်ဘက်ကို မျက်နှာလှည့်လာပြီကိုး။


" ကာရံမပါတဲ့ ကဗျာတွေက ကုန်းပေါ်ရောက်လာတဲ့ သင်္ဘောသားလိုပဲ "

" ဟမ် ဘယ်လို "

" ကြည့်ရရှုရ တာ အချိုးမပြေတာကို ပြောတာ "

" အော အဲ့လို "

" ကာရံဆိုတာက ဥပမာကွာ "

" အင်း "

" စာသင်နေခိုက် ပျင်းရိငိုက် လူမိုက်မောင်ကုလား ဆိုတာမျိုး ကဲ မလှဘူးလားကာရံလေး "

" အင်း လှတယ် "

" ရွတ်လို့ဖတ်လို့ကောအရသာမရှိပေဘူးလား "

" ကောင်း ကောင်းပါတယ် ဒါနဲ့ ကျုပ်ကိုဘာရည်ရွယ်နဲ့ဒါတွေပြောနေတာလဲဟင် "

" ကာရံဆိုတာကဗျာရဲ့အသက်ကွ ကာရံမဲ့ကဗျာတွေ ရေးနေ ဖန်တီးနေကြတာတွေ

ငါ နည်းနည်းမှမကျေနပ်ဘူး ဒင်းတို့တွေ အနှစ်သာရအပြည့်နဲ့ ဂန္တ၀င်ကဗျာတွေကို

 ဖျက်ဆီးနေကြတာပဲ ရေးချင်သလိုရေးရင် ကဗျာဖြစ်ပြီထင်နေတာတွေ ငါသိပ်ရွံတယ် "


" ဟမ် အဲ့ဒါတွေကျုပ်နဲ့ဘာဆိုင်တုန်းဗျ နောက်ပြီး ပြောရအုံးမယ် ခင်ဗျားသိပြီးသားလည်း

 ဖြစ်ချင်ဖြစ်မှာပဲ ဆရာကြီး မင်းသုဝဏ်ရဲ့စကားပါ့ ကာရံမဲ့ဆိုတာ ကဗျာမှာမရှိဘူး

ကာရံလွတ်လပ်တာပဲရှိတယ် အသံပါတယ် ရစ်သမ်ပါတယ် ကာရံနဲ့ရစ်သမ်တစ်ခုခုမပါရင်

ကဗျာမဟုတ်ဘူး ဖရီးဗာ့ (free verse) ဆိုတာကို ကာရံမဲ့လို့ တလွဲဘာသာပြန်နေကြတယ်

အမှန်က ကာရံမဲ့တာမဟုတ်ဘူး ကာရံကို လွတ်လွတ်လပ်လပ်ယူနိုင်တာပဲ free ကို မဲ့ နဲ့ လွတ်လပ်

အဓိပ္ပါယ်မှားပြီး ဒီမှာယူဆနေကြတာ ပြီးတော့ ကဗျာလိုင်စင်-ပွတ်တစ်ပ်လိုင်စင် ဆိုတာလည်း

ရှိတာပါပဲဗျာ တဲ့ "

" သူ့အယူအဆကို ငါက မျက်စိမှိတ်ခေါင်းညိတ်နေမယ့် ခပ်တုံးတုံး ကောင်များ မှတ်နေလား "


" ဟားဟား ခင်ဗျားကရယ်ရတာပဲ ဒီမယ် ကိုယ့်ဆရာ ခင်ဗျားဘာသာ ယုံတာ မယုံတာက

ခင်ဗျားအပိုင်း ခင်ဗျားမယုံလို့လည်း ရေစီးကြောင်းကြီးက ပြောင်းသွားမှာမဟုတ်သလို ခင်ဗျား

မယုံဘူးဆိုတာ ခင်ဗျားအနေနဲ့ အဲ့ဒါတွေကို စနစ်တကျ မချဉ်းကပ်ခဲ့ဖူးလို့လည်းဖြစ်နိုင်တယ်

ဒါမှမဟုတ် ချဉ်းကပ်ဖို့ လုံးလုံးစိတ်မ၀င်စားတာဖြစ်မယ်

တစ်ခုခုကို စိတ်ဝင်တစားမရှိတဲ့သူတစ်ယောက်က အဲ့ဒီအပိုင်းကို ဘာမှမခံစားတတ်တာ

လက်မခံနိုင်ဖြစ်ရတာ မဆန်းဘူး အဲ့ဒီတော့ ယုံတဲ့သူတွေဆက်လုပ်ကြလိမ့်မယ် လုပ်နိုင်သူတွေ

လုပ်နေကြတာကို ခင်ဗျားအနေနဲ့ ဘာမှမကျေမနပ်ဖြစ်နေစရာမလိုဘူးလို့ မထင်ဘူးလားဗျာ "

" ကောင်းပြီလေ အဲ့ဒါကိုထားလိုက်ပါအုံး  တစ်ခုမေးမယ်

မောင်ရင် ဂန္တ၀င်ကဗျာတွေနဲ့စာရင်မော်ဒန်တွေ ကသောင်းကနင်းနိုင်တာကို လက်ခံရဲ့လား "

" ၀မ်းနည်းပါတယ်ဗျာ ခင်ဗျားပြောတာကို လက်မခံနိုင်ပါဘူး "

 " ဒါဆိုလည်း အဲ့သည်နှစ်ခုမှာ ဘယ်ဟာကပိုပြီး တန်ဖိုးကြီးသလဲဆိုတာ  နှိုင်းယှဉ်ပြစမ်းပါ "

"ဟာဗျာ ဒါကတော့ ခင်ဗျားနှယ် ကတ်သီးကတ်သတ် "

 " လုပ်စမ်းပါ မောင်ရင်သိသလောက် "

" ဟို ဟိုလေ မပြောလို့မရဘူးလား "

" အမြင်ချင်းဖလှယ်တာပါမောင်ရင်ရာ ပြောမှာသာပြောစမ်းပါ "

" ကောင်းပြီလေ ဒီလိုဗျာ ဂန္တ၀င်နဲ့မော်ဒန်ဆိုတာက....... "

" ၀ုန်း ဂလွမ်း ခွမ်း "

" အာ ဘာသံတွေလဲကွာ "

ရုတ်တရက်ကြီးပွက်လောရိုက်လာတဲ့ဆူညံသံတွေကြောင့် စိတ်ပျက်လက်ပျက်ထအော်မိသည်။

အိပ်ယာဘေးကပ်ရက်စားပွဲပေါ်ကစားပွဲတင်နာရီလေးကြမ်းပြင်ပေါ်ကျနေတာကိုတွေ့မှ

" မိရွှေဝါတို့လုပ်ချလိုက်ပြန်ပြီထင်တယ် ဟူး တော်ပါသေးရဲ့ ဒင်းကယ်လို့  နို့မို့

ငါအိပ်မက်ထဲမှာ ဘယ်လောက်တောင်တိုင်ပတ်နေဦးမယ်မသိဘူး "

ခုတင်ခြေရင်းမှာ သူနဲ့မဆိုင်သလိုလို ကွေးကွေးလေးဝင်ခွေနေတဲ့ကြောင်မလေးမိရွှေဝါကိုပဲ

ရှဲရှဲထအော်ပြရမလိုလို။ ရှဲရှဲသွားလုပ်ပြလည်းဒင်းနာလည်မှာမဟုတ်ပါဘူးလေ။

တိရစ္ဆာန်ပဲ လူလိုမှအသိမရှိတာ။

တော်ကြာသူ့ကိုမျက်စိနောက်အောင်လုပ်ပြနေပါတယ်ဆိုပြီးထကုတ်ခြစ်နေမှအခက်။

ဘာပဲဖြစ်ဖြစ် ကျေးဇူးတင်ကြောင်းတော့တိုးတိုးလေးရေရွတ်မိတယ်။

" ကျေးကျေးပါ ရွှေဝါရေ "

" ပါးစပ်ကပဲ ကျေးဇူးတင်မနေပါနဲ့ "

" ဟာ ညွတ်ချာဖျား မာတာအမိကယ်ပါ "

ဘာတွေဖြစ်ကုန်ပြီလဲ ။ကျွန်တော်အိပ်ပျော်နေဆဲကာလအတွင်းလေးမှာ လောကကြီးက

အဲ့သလောက်တောင်ပြောင်းလဲသွားပြီလား။တစ်ခုခုတော့အကြီးအကျယ်လွဲမှားနေပြီ

ထင်သည်။တိရစ္ဆာန်တစ်ကောင်ဖြစ်သော ကြောင်မလေးမိရွှေဝါထံမှ လူစကားသံ ပီပီသသကြီး

ထွက်လာသောကြောင့်ကျွန်တော်လန့်သွားရပြီး အိပ်ယာပေါ်လှဲနေရာမှ ငေါက်တောက်ထထိုင်မိသည်။

" စော စောနက စကားပြောလိုက်တာ နင် နင်လား မိရွှေဝါ "

မယုံမရဲမေးမိသည်။ဒါကိုမိရွှေဝါက မျက်မှောင်ကြုတ်ကြည့်လိုက်ပြီး

" ဟုတ်တယ်လေ ဘာဖြစ်လို့ လဲ "

" မိရွှေဝါ နင် နင် မနောက်နဲ့ နော် "

" ရော် ဘာကိစ္စနောက်ရမှာလဲ ပုံစံကိုက အူကြောင်ကြောင်နဲ့ "

" အင် မ မဟုတ်သေးဘူးလေ နင် နင် က ကြောင် ကြောင် လေ "

" အင်းလေ အဲ့တော့ဘာဖြစ်လဲ "

" ကြောင်က လူစကားမပြောရဘူးလေဟာ "

" ဘယ်ဘုရားကဟောထားခဲ့လို့ လဲ "

" အု "

တတ်သမျှ၊မှတ်သမျှ ဘုရားဟော တရားတော်တွေအသည်းအသန်ပြန်စဉ်းစားကြည့်မိသည်။

ကျွန်တော်ကပဲ သွေးပျက်နေလို့ လား။ ဗဟုသုတပဲ ခေါင်းပါးလေသလား။

ဒါမှမဟုတ် ဘယ်ဘုရားကမှ တကယ်မဟောခဲ့လို့လားတော့မသိ ။

ခေါင်းထဲပေါ်လာသမျှ တရားတော်တွေထဲမှာ "ကြောင်သည်လူစကားမပြောရ "

ဟူသော အဆိုအမိန့်က ရေးရေးလေးတောင်မတွေ့ ဖြစ်နေရသည်။

" ဒါ ဒါကတော့ ဘုရားဟောမှသိရမယ့်အရာမျိုးမှမဟုတ်တာ

သဘာဝချင်းမတူဘူးလေဟာ အဲ့ဒီတော့နင်လူစကားမပြောနဲ့ "

ကျွန်တော်စိတ်ညစ်ညစ်နဲ့ ဖိဟောက်ပစ်လိုက်သည် ။

မိရွှေဝါတို့ကြောက်မယ်ထင်သလား...ဝေးသေး။

နှုတ်ခမ်းမွှေးတွေထောင်တက်လာအောင်နှုတ်ခမ်းစူပြနေသေး၏။

ကြည့်ရမြင်ရတာ အဆင်မပြေလိုက်တာ ။ တောက်ခ် ကြောင်စုတ်မ ။

" ဘာဖြစ်လဲပြောတော့ ငါ့ပါးစပ်နဲ့ငါပြောတာပဲ "

" ဟမ်  နင်ကကြောင်ပါဆို "

" သိပါ့တော် "

" သိရင်လူစကားမပြောနဲ့ "

" ဟဲ့ ကိုယ့်ပါးစပ်နဲ့ကိုယ်ပြောတာ နင်နဲ့ဘာဆိုင်တုန်း "

အံမာ လာလာချည်သေး။ကြောင်မကများနှုတ်သီး လာကောင်းပြနေရတယ်လို့။

" နင်နော် ကြောင်ပါးမ၀နဲ့ "

"နင်သာ လူပါးဝနေတာ ငါ့ပါးစပ်နဲ့ငါပြောတဲ့ဟာကို နင့်စီးပွါးအိုး တုတ်နဲ့တက်ထိုးနေလို့လား "

" အဲ အဲ့လိုလဲမဟုတ်ဘူးလေ "

" ဘာမဟုတ်တာလဲ နင်တို့လူတွေဟာလေ တော်တော်တရားကျဖို့ကောင်းတယ်

စောစောကကျတော့ ငါ့ကိုကျေးဇူးတင်သလေးဘာလေးနဲ့ ဟွန်း အခုကျတော့

ကက်ကက်လန်ရန်တွေ့နေလိုက်တာ အံ့သြပါ့တော် "

" ဗျာ "

" ဘာမှမဗျာနဲ့နင်တို့လူတွေကို အဲ့ဒီကျေးဇူးဆိုတဲ့စကားနဲ့ပတ်သက်ပြီးငါကြည့်မရတာကြာပြီ "

" ဘာ ဘာဖြစ်လို့လဲဟ "

" ဘာဖြစ်ရမှာလဲ ကျေးဇူးဆိုတဲ့စကားကို လေအလကားရတိုင်း အလွယ်ပြောပြောနေကြတယ်

တကယ့်စိတ်ထဲကကျေးဇူးတင်တာလဲမဟုတ်ပဲနဲ့ အလကား အာပလာတွေ နင်တို့လူတွေကိုငါ

စိတ်ပျက်လိုက်တာဟယ် စကားကိုပြီးစလွယ်ပြောနေကြတော့တာပဲ  "


" အဲ့လိုကြီးလဲမဟုတ်သေးဘူးလေဟာ အလ္လာပ သလ္လာပ ဆိုတဲ့ အတိုင်း... "

" တော် တော် နင်တို့လူတွေရဲ့ ထုံးစံအတိုင်းဆင်ခြေဆင်လက်တွေတတွတ်တွတ်

လာရွတ်ပြမနေနဲ့ နင်လည်းတစ်ခြားသူတွေလို အတူတူပဲ ကျေးဇူးဆိုတဲ့စကားကို

ပေါက်လွတ်ပဲစား ပြောတယ် "

" ဟမ် ဒါတော့ နင်လွန်ပြီ ငါဘာအမှားလုပ်မိလို့ လဲ "

" ဟဲ့ လူကောင် ရူးချင်ယောင်ဆောင်မနေနဲ့နင်ပဲငါ့ကိုကျေးဇူးတင်ပါတယ်

ပြောပြီး နင်ပဲ ငါ့ကိုရန်လုပ်နေတာလေ "

" အာ ဒါက ဟို ဟိုလေဟာ "

" တော် တော်တော့ အပြောင်းအလဲမြန်လွန်းတဲ့နင်တို့လူတွေကို ငါစိတ်ကုန်တယ်

လူစကားပြောရတာငါ့ပါးစပ်သနတယ်ဟဲ့ အခုအချိန်ကစပြီးလူစကားမပြောတော့ဘူး ဒါပဲ "

" ဟာ အဲ့လိုမလုပ်နဲ့ လေ ငါရှင်းပြပါရစေဦး "

ညောင်

" ငါ ရုတ်တရက်ကြီးဆိုတော့ အံ့သြသွားလို့ပါဟ "

ညောင်

" ငါနင်ထင်သလို အပြောင်းအလဲမြန်တဲ့သူမဟုတ်ပါဘူးဟ လူစကားပြောလေဟာ "

ညောင်

" မိရွှေဝါ ငါ့ကိုစကားပြန်ပြောပါဆို "

ညောင်

" ဘယ်ဘုရားမှ မဟောခဲ့ဘူးလေ "

ညောင်

" ငါစိတ်တိုလာပြီနော် "

ညောင်

" မိရွှေဝါ နင်လူစကားမပြောဘူးလား ငါထကန်မိတော့မယ် "

ညောင်

" ဟာကွာ ကဲ ဒီလောက်တောင်ကြောင်ပါးဝချင်တဲ့ ကြောင်မ "

"၀ုန်း " " ဘုံး " " အားကျွတ်ကျွတ် "

ကုတင်ပေါ်ကနေ ပစ်စလက်ခတ်ကြီးပြုတ်ကျလာသောကြောင့်

အီစလံဝေသွားရသည်။ ကြမ်းပြင်ပေါ်မှ လူးလဲထလိုက်ပြီး အခန်းထဲကိုဝေ့ကြည့်မိတော့

မိရွှေဝါလဲမရှိ။နာရီကလဲ စားပွဲပေါ်မှာ ပကတိအတိုင်းခပ်တည်တည်ကြီးထိုင်နေသည်။

" ဟာကွာ ဘယ်လိုဖြစ်ရတာလဲ ဒါကလည်း အိပ်မက်ပဲလား "

ဘယ်လိုကြီးမှန်းလဲမသိ ။ အိပ်မက်ထဲမှာပဲ အိပ်မက်ထပ်မက်ရတယ်လို့ ။

တော်တော်အူကြောင်ကြောင်နိုင်တာပဲ။ ရီစရာကြီး ဟီးဟီး။

ကြိတ်ရယ်မိသည်။အကျယ်ကြီးတော့အော်မရယ်ရဲ။တော်ကြာ

သည်အချိန်ကြီးတဟီးဟီး တဟားဟား အော်ရယ်ရမလားဆိုပြီး ဖားသားကြီး

လက်သီးထက် ပိုကြောက်ရသော မားသားကြီးပါးစပ်နဲ့ သာမန်ပွဲချိန်တင်မက

အချိန်ပိုတွေ ပင်နယ်တီတွေအထိပါ တွေ့ သွားနိုင်သည်။ ဟုတ်တယ်လေ ။

စားပွဲပေါ်ကနာရီဒိုင်ခွက်မှာပြနေတာက ၁၂ နာရီ ၁၅ မိနစ် မတိတတိ။

မားသားကြီးပြောနေကြစကားအတိုင်းပြောရရင် " လူအိပ်ချိန်ကြီး " ဖြစ်သည်။

အတော် ဂွတီးဂွကျနိုင်တဲ့စကားလည်းဖြစ်၏။

သည်အချိန်မအိပ်ရင်ပဲ ကိုယ်က လူ မဟုတ်သလိုလို။

" လူမဟုတ်တော့ ဘာအရေးလဲကွာ ဗိုက်ဆာတယ်မီးဖိုချောင်ထဲ သွားမွှေကြည့်ဦးမယ် "

မီးဖိုချောင်ဘက်ထွက်ခဲ့လိုက်သည်။

" ဟာ သူခိုး "

ကျွန်တော့်အခန်းနဲ့မီးဖိုချောင်ရဲ့ကြားမှာ ဧည့်ခန်းရှိသည်။

ယခု ဧည့်ခန်းထဲမှာ မဲမဲ   မဲမဲနဲ့လူတစ်ယောက်ကိုတွေ့လိုက်ရ၏။

အမှောင်ထဲမှာမအိပ်တတ်လို့စာကြည့်မီးဖွင့်အိပ်တတ်သောအကျင့်ကြောင့်

ကျွန်တော့်အခန်းက မှုန်ပျပျလေးအလင်းရောင်သန်းနေသော်လည်းဧည့်ခန်းနှင့်

မီးဖိုချောင်ဘက်မှာက မီးပိတ်ထား၍ရိုးတိုးရိပ်တိတ် မြင်ရရုံသာရှိ၏ ။

လူလုံးလူဖန် မသဲကွဲ။ဖားသားကြီးနဲ့မားသားကြီးကအပေါ်ထပ်မှာအိပ်သည်။

သည်အချိန်ကြီးဆင်းလေ့ဆင်းထမရှိ။ သူတို့ဆိုရင်လဲ မီးခလုတ်ဖွင့်မှာပဲလေ။

တစ်အိမ်လုံးပေါင်းမှ လူသုံးယောက်သာရှိသောကြောင့် ဒါသူခိုးပဲဟုကျွန်တော့်စိတ်က

တန်းသိလိုက်ပြီ။ဧည့်ခန်းဘက်ကို ခြေဖွဖွလေးနင်းလျှောက်လာပြီး အခြေအနေကို

ဂရုစိုက်ကြည့်ကာ အကဲခတ်မိတော့........


" အံမာ အံမာ သူခိုးကအတင့်ရဲလှချည်လား ဧည့်ခန်းထဲက ဆိုဖာခုံပေါ်မှာတောင် ဇိမ်ပြေနေပြေ

ဝင်ထိုင်နေသေးတယ် သူ့အိမ်များမှတ်နေလား မသိဘူး တွေ့ကြသေးတာပေါ့ကွာ "

ကျွန်တော်စိတ်ကိုတင်းပစ်လိုက်သည်။ဘာကြောက်စရာရှိလဲ ငါကအိမ်ကွင်းပဲဟာ ဟု

ဇွတ်တွေးယူလိုက်ပြီး သူခိုးရှေ့တည့်တည့်ဆိုဖာခုံပေါ်မှာ ၀င်ထိုင်ပစ်လိုက်သည်။

အဲ ၀င်ထိုင်ပြီးတော့မှ ဘာလုပ်ရမှန်းမသိ။ ဘာက ဘယ်လိုစပြောရမှန်းမသိဖြစ်ရပြန်သည်။

ဟမ် ဒင်းက မခန့်လိုက်ပုံများ ခြေကလိမ်ချိတ်ပြီး ဒူးတောင်နန့်ပြနေသေး၏။

မဖြစ်သေးပါဘူး တစ်ခုခုတော့ပြောမှဖြစ်မယ်။
 
" ဟေ့လူ ခင်ဗျားက ဘယ်သူလဲ ဘာခိုးမလို့လဲ မှန်မှန်ပြောနော် မပြောရင် ကျွန်တော်အော်လိုက်မှာ "

အလဲ့ တယ်ဟုတ်တဲ့ငါပါလား။ဟိန်းထွက်လာသော ခပ်ပြတ်ပြတ်အသံကို ကျေနပ်မိသည်။

တော်ရုံတန်ရုံလူ အသံနဲ့တင်ဖျားသွားနိုင်၏။ အဲ မောင်မင်းကြီးသား သူခိုးကတော့ မဖြုံရေးချမဖြုံ။


" ကိုယ် အခုဘယ်နေရာမှာထိုင်နေလို့လဲ "

" ဧည့်ခန်းမှာဗျ "

" ဧည့်ခန်းဆိုတာ ဘာလုပ်ဖို့အတွက်ထားတာလဲကွ ကောင်လေးရ "

" ဧည့်ခန်းပါဆို ဧည့်သည်တွေကိုဧည့်ခံဖို့နေရာပေါ့ဗျ "

" အေး ရှင်းနေတာပဲ ကိုယ်ကဧည့်သည်တွေကိုဧည့်ခံဖို့ထားတဲ့နေရာမှာ

ထိုင်နေတဲ့အတွက်ဧည့်သည်ပေါ့ ကောင်လေးလဲဧည့်ခန်းထဲရောက်နေတဲ့အတွက်

ဧည့်သည်ပဲကွ  ကိုယ်တို့ကဧည့်သည်ချင်းအတူတူပါပဲ "

" ဗျာ "

ဘယ့်နှယ်လူကြီးလည်းမသိ။ကိုယ့်အိမ်မှာ အချိန်မတော်ကြီးလာငုတ်တုတ်ထိုင်နေပြီးတော့

ကိုယ့်ကိုတောင် ဧည့်သည်ချင်းအတူတူပဲဖြစ်ရသေးတယ်။


" ဟေ့လူ ဝေ့လည်ချောင်ပတ်လုပ်မနေနဲ့ ခင်ဗျားဘယ်သူလဲ "

" ကိုယ့်နာမည်က ဂရေဟမ်ဂရင်း "

" ဂရေဟမ်တော့သိတယ် အဆိုတော်လေ ဂရေဟမ်ဂရင်းမသိဘူး "

" အင်မတန်သနားဖို့ကောင်းတာပဲ ဗဟုသုတကလဲ ခေါင်းပါးလိုက်တာ "

" ဘာဗျ "

"  ကိုယ့်လိုကမ္ဘာကျော်ဗြိတိသျှ စာရေးဆရာကြီးတစ်ယောက်တောင်မသိဘူးဆိုတော့

ကောင်လေးရဲ့အဖြစ်ကသနားဖို့ကောင်းနေပြီ "

" ဗျာ ခင်ဗျား ခင်ဗျားက ဗြိတိသျှစာရေးဆရာကြီး ဂရေဟမ်ဂရင်းဆိုတာလား "

" ကောင်လေး သိတယ်လား "

" နာမည်ကြားဖူးရုံပါပဲ အဟဲ "

" အိမ်း သည်လောက်ဆိုရင်ပဲမဆိုးသေးဘူးလို့မှတ်ရမှာပဲ အဟတ် "

" ဒီမှာ ခင်ဗျားဘာသာ ဂရေဟမ်ဂရင်းဖြစ်ဖြစ် ဘာဂရင်းကြီးပဲဖြစ်ဖြစ်

အခုလိုညကြီးအချိန်မတော် သူများအိမ်ထဲလာထိုင်နေတာတော့ မကောင်းဘူးဆိုတာ

နားလည်သင့်တယ် အဲ့ဒီတော့ခင်ဗျားအေးအေးဆေးဆေးပြန်ပါ လူကြီးတွေနိုးသွားရင် မလွယ်ဘူး "


" စိတ်မပူပါနဲ့ကွ ဘာလူကြီးမှမရှိပါဘူး ဒီအိမ်ကြီးတစ်အိမ်လုံးမှာ ကိုယ်တစ်ယောက်တည်းနေတာ "

" ဘာရယ် "

ခေါင်းတစ်ခေါင်းလုံးချာချာလည်ထွက်သွားရသည်။

ကျွန်တော်ရောက်နေသော အခန်းထဲကိုသေချာပြန်ကြည့်လိုက်မိတော့ မျက်လုံးပါပြူးထွက်သွားရပြန်သည်။
  ဒါကဘယ်လိုဖြစ်ရတာလဲ ။ငါထွက်လာတုန်းက ငါ့အခန်းပါဟ။ ငါဝင်ထိုင်လိုက်တာကလည်း

ငါ့အိမ်ဧည့်ခန်းပါပဲ။အခုမှချက်ချင်းလက်ငင်းကြီးဘယ်လိုကြောင့် အခန်းက

အပြင်အဆင်တွေပြောင်းနေရတာလဲ။ဒါ ဒါက ဂရေဟမ်ဂရင်းဆိုတဲ့လူကြီးရဲ့အိမ်လား။

ဒါဆို ငါ ငါက ဟိုက် ဒုတ်ခေါ  ငါ သူခိုးဖြစ်နေပါကောလား။

ကျွန်တော့်တစ်ကိုယ်လုံးရှိမွှေးညှင်းပေါက်များမှ ချွေးစေးတွေအပြိုင်းအရိုင်း

စိမ့်ထွက်လာကြသည်။ ယခု ကျွန်တော်ရောက်နေတဲ့အခန်းက အကျယ်ကြီး။

ကျွန်တော့်အိမ်ထက် ၃ ဆခန့်ကျယ်မည်ထင်သည်။

အခန်းနံရံပတ်လည်မှာလဲ စာအုပ်တွေနဲ့အလှဆင်ထားသေး၏။

သေချာပါသည်။ ဒါ ကျွန်တော့်အိမ်မဟုတ်။

" ဘာတွေလဲကွာ "

စိတ်ညစ်ညစ်ဖြင့်ခေါင်းကိုရမ်းထုတ်ပစ်လိုက်သည်။

ညစ်နေသောစိတ်ကလွင့်ပါမသွား။


" ဘယ်လိုလဲကောင်လေး ကိုယ့်ကိုနှင်ထုတ်ဦးမလား "

" မနှင်တော့ပါဘူးဗျာ ဒါကျွန်တော့်အိမ်မှမဟုတ်တာ ဒါနဲ့ကျွန်တော်က

ဘယ်လိုဖြစ်ပြီး သည်အိမ်ထဲကိုရောက်နေရတာလဲဗျ  ဘာမှကို နားမလည်နိုင်တော့ဘူး "


"  ဒီလိုပဲကောင်လေး  ကိုယ်တို့တွေက  ကိုယ့်ကိုယ်ကိုဧည့်သည်လား

အိမ်ရှင်လားကောင်းကောင်း မဝေခွဲကြတတ်ဘူးကွ ကောင်လေးက အခု

အိပ်မက်မက်နေတာ "


" ဗျာ အိပ်မက် မက်နေတာ "

" အင်း ဟုတ်တယ် အိပ်မက်ထဲမှာ ကိုယ်နဲ့တွေ့နေတာ "

" ဟာ မဟုတ်တာ ကျွန်တော်အခုပဲ အိပ်မက်က လန့်နိုးလာတာဗျ "

" ကဲပါ ဒါတွေထားပါတော့ အိပ်မက်တွေက ဆန်းကြယ်လွန်းပါတယ်

ဒါနဲ့ ကောင်လေး ကိုယ့်စာတွေဖတ်ဖူးလား "


" ဟင့်အင်း စာအုပ်ကို ကိုင်မကြည့်ဖူးတာ "

" ဟားဟားဟားဟား ကောင်းပါလေ့ကွာ ကိုယ့်မှာတော့နောင်လာနောင်သားတွေအတွက်

ဆိုပြီး ကိုယ့်ဘ၀ရဲ့အချိန်တွေကိုရင်းနှီးမြုပ်နှံလိုက်ရတာ  ကောင်လေးတို့ လူငယ်တွေက

ကိုယ့်စာအုပ်တောင် ကိုင်မကြည့်ဖူးကြတော့ပဲကိုးကွ ဟားဟားဟားဟား

ကောင်းတယ် ကောင်းတယ် "

ကျွန်တော့်ရှေ့က လူကြီးရဲ့ ရယ်သံက ခြောက်ကပ်ကပ်။ ရယ်တာနဲ့မတူပဲ ငိုနေသည်ဟုပင်

ထင်မိသည်။ ပိုင်းခြားထားသော အမှောင်စကြောင့် သူ မျက်ရည်ကျ မကျကိုတော့ သေချာမမြင်ရ။

" ကောင်လေး စာပေကိုစိတ်ဝင်စားလား "

" ဟုတ် နဲနဲပါးပါးတော့ လေ့လာဖြစ်ပါတယ် "

" ကိုယ်က လေ့လာဖြစ်လားမေးတာ မဟုတ်ဘူးလေ စာပေကို စိတ်ဝင်စားလားမေးတာ "

" စာအုပ်စာပေလူ့မိတ်ဆွေပဲဗျ စိတ်ဝင်စားတာပေါ့ "

" အင်း ဒါဆိုရင် စာပေနဲ့ပတ်သက်ပြီး ကောင်လေးအတွက်  စကားတွေ

ကိုယ်လက်ဆောင်ပေးမယ် ဘယ်လိုလဲ နားထောင်မလား "

"  နားထောင်မယ်ဗျာ ကြာသလားလို့ "

ဘာရယ်မဟုတ်။ လူကြီးပြောအားရှိအောင်  ခန္ဓာကိုယ်ကို မတ်နေအောင် ပြောင်းထိုင်လိုက်ရင်း

ဂရုတစိုက် နားထောင်ပေးမိသည်။

" အေး ကောင်လေးတို့ မျက်မှောက်ခေတ်စာပေရေစီးကြောင်းမှာ ဝထ္ထုတွေက

သတင်းဆန်လာပြီး သတင်းတွေက ဝထ္ထုဆန်လာကြပြီကွ "

" ဗျာ ဟုတ် ဟုတ်လို့လား "

" ဟုတ်တာပေါ့ နောက်ထပ် အရမ်းဝမ်းနည်းဖို့ကောင်းတာတစ်ခုက ရသဆိုတာကို

စာပေလုပ်သားတော်တော်များများ သေချာနားမလည်ကြတော့ဘူး "

" ဘယ်လို "

"  ဒီလိုကွ အခုလောလောဆယ် ကိုယ်တွေ့နေမြင်နေရသလောက်မှာ

ရသစာပေအများစုဟာ သုတဘက်ကို တော်တော်ကြီးယှက်နွယ်သွားကြပြီ

ရသစာပေ စစ်စစ်မရှိသလောက်ဖြစ်နေတယ် ရသနဲ့သုတ ကြားမှာ ခြားထားတဲ့

နံရံကလဲ ပျောက်ကွယ်လုနီးနီး အခြေအနေကို ရောက်လာပြီ "

" ဟာ ဟုတ်လို့လား ဒါဆို ရသနဲ့သုတ က ဘယ်လို ကွာ တာလဲဗျ "

" အင်း ဒီလိုရှိတယ် ကောင်လေးရ ရသစာပေဆိုတာက အနုသဘော ၊

သုတဆိုတာက အမာသဘောလေ ရသနဲ့သုတ ရဲ့အဓိက ကွာခြားချက်က........."

ကလင် ကလင် ကလင်

ကလင် ကလင် ကလင်

ကလင် ကလင် ကလင်


ဟာကွာ သည်နာရီကတစ်မှောင့်။

၆နာရီအတိမှာ ထမြည်လာသော နာရီနှိုးစက်သံကြောင့် ကျွန်တော်လန့်နိုးလာရပြန်သည်။

ငါ အလန်း ပေးထားမိလို့လား?  အာ  မသိတော့ဘူး။

နာရီကို အလန်း ပေးမိလား မပေးခဲ့ဘူးလား ဆိုတာ ဇဝေဇ၀ါဖြစ်နေရ၏။
    ငါအလန်း မပေးဘဲနဲ့တော့ သည်ကောင်ကြီး ထအော်မှာ မဟုတ်ပါဘူး။

ငါပဲ မေ့နေတာဖြစ်မယ် ။ တောက်ခ်  သည်တစ်ညလုံး ဘာတွေဖြစ်နေမှန်းကို မသိဘူး။

အိပ်မက်တွေချည်း ထပ်တလဲလဲ မက်နေပါကောလား ။

 နှိုးစက်ကို ထပိတ်လိုက်ပြီး အိပ်ယာပေါ်မှာပင် ဆက်လှဲနေမိသည်။

လက်ရှိအချိန်ကကော အိပ်မက်ထဲမှာပဲလား ဒါမှမဟုတ် ငါတကယ်ပဲ

အိပ်မက်ထဲက နိုးထလာတာလား ။

ကိုယ့်ကိုယ်ကို မယုံမရဲပြန်မေးမိသည် ။ အဖြေကလည်း မရဲ ။

ကျွန်တော် အိပ်မက် ထဲက နိုးထလာတာဖြစ်နိုင်သလို အိပ်မက်ထဲမှာပဲ

သံသရာလည်နေတာလဲ ဖြစ်နိုင်ပါသည်။

" အိပ်မက် လား တကယ်လားသိချင်ရင် ကိုယ့်အသားကို ပြန်ဆိတ်ကြည့်

သိနိုင်တာပဲ မနာရင်အိပ်မက် နာရင်လက်တွေ့ဘ၀ပေါ့ကွ တောက်

ငါ ဒါကိုဘာလို့ မေ့နေပါလိမ့် "

အခန်းနံရံသာ ဖော့တုံးဖြင့် ပြုလုပ်ထားသည်ဆိုပါက ခေါင်းဖြင့် အကြိမ်ကြိမ်

ပြေးဆောင့်ပစ်ချင်လောက်အောင် ကိုယ် တုံးအပုံ သောက်သုံးမကျပုံ ကို စိတ်တိုနေမိသည် ။

" ကဲ ဆိတ်တယ်ကွာ "

" အား လား လား နာ တယ်ဟ "

" ဒါဆိုသေချာပြီ ငါအိပ်မက်ထဲက နိုးထခဲ့ပြီပေါ့ ဟေးဟေး "

ဘာကြောင့်ရယ်မသိ ။ ပျော်ရပါသည် ။


အချစ်ရေ

အိပ်မက်ဆိုတာ နိုးထရမယ့်အမျိုးဆိုပေမယ့်

လန့်လန့်နိုးလာတဲ့အခါ

အသက်ဓာတ်ကလေး ပါမလာတော့ဘူးရယ် ။

ကိုယ့်မှာ

ထ "  ထ " ယောင်နေရတာနဲ့ပဲ

ညရေးညတာတွေ ပိန်ချိလို့ ။


အိပ်ရေးပျက်ညတွေများလာတော့ အိပ်မက်တွေလဲ ကမောက်ကမ.....

တချို့တ၀က်က ၀မ်းစာမပြည့်ခဲ့ရှာဘူး..........။


ရူးသွပ်ရဆုံးသော ဇာတ်လမ်းတစ်ပုဒ်မှာ ရူးသွပ်ခြင်းသည် ၀၀လင်လင်




" စံပယ်ရေ

မင့်ကို ချစ်တယ် ဆိုတာ

နှင်းက ဆောင်းကိုချစ်သလို

တီတစ်ကောင်က မြေကိုချစ်သလို

ကြိုးကြာငှက်တို့ အမိမြေကိုချစ်သလို

မင့်ကို ငါလည်း စူးစူးနင့်နင့် ချစ်ခဲ့ "  


           အဲ့သလို ကြေကွဲသီချင်းနဲ့ပဲ နေသားကျချင်ယောင် ဆောင်နေပါတယ် ။

 ဆေးလိပ်တွေ တအားသောက်တာပဲ     ဆိုတဲ့အသံလေး ဝေးသွားပြီးနောက်မှာ

ဆေးလိပ်တွေပိုသောက်ဖြစ်လာတယ် ။ လိုတာထက် ပိုပြုံးပြဖြစ်လာတယ် ။

ကိုယ့်ဘာသာစကားနဲ့ကိုယ် ဆွံ့အသွားတယ်  ။  တစုံတရာကို ယုံကြည်သင့်

မယုံကြည်သင့်ဟာ  အရင်လို  ပြဿနာမဟုတ်တော့ဘူး ။  ယုံကြည်လိုစိတ်

ခမ်းခြောက်လာတယ် ။ တစ်ယောက်တည်း လမ်းက ကြမ်းလိုက်တာကွယ် ။

ကိုယ့်စိတ်နဲ့ကိုယ် ၀င်လာခဲ့ပြီး ဆိုတော့ လွယ်လင့်တကူ ပြန်မဆုတ်ခွာဖြစ်ဘူး ။

တကယ်ဆို စ ၀င်ခဲ့ကတည်းက လမ်းကိုအမှတ်အသားမပြုခဲ့သလို ခြေလှမ်းတွေကိုလည်း

မရေတွက်ခဲ့ပဲလေ ။ ကျွန်တော်ဘယ်ကိုရောက်နေပြီလဲ ။

ဘယ်လိုဆက်သွားရမှာလဲ ဟင် ။  သိပ်မှောင်တာပဲ ။ အနက်လား ။ ခရမ်းလား ။ မသဲကွဲဘူး ။

အလင်းကိုရှာတော့ ဘုံဆိုင်လေးတွေ့တယ် ။     


            အဲ့သည်ဘုံဆိုင်လေးမှာပေါ့ ။    " ကျေးဇူးတင်ပါသည် ' ကို မတင်းတိမ်နိုင်လို့

နောက်တစ်လုံး ထပ်ဖွင့်ချလိုက်တော့  အဖုံးမှာ  " ကျေးဇူးတင်ပါသည် " ပဲ ထပ်တွေ့တယ် ။

ကြေကွဲရပါတယ် ။ ဘာကို ရိုးမယ်ဖွဲ့ပစ်သင့်သလဲ ။  ထားလိုက်ပါ ။ ကျွန်တော် မမူးသေးပါဘူး ။

အဲ့ဒါကြောင့်မို့ ကံထမ်းလာတာကို မြင်တာပေါ့ ။ မဟုတ်သေးဘူး ။

ကံထမ်းလာသူကို မြင်လိုက်တာပါ ။

"  ဟေ့ ငါ့ဆီက လိုချင်တာယူသွား ငါ့အတွက် ကျေးဇူးတင်ပါသည် တစ်လုံး ထပ်ချပေး "

ချစ်မိသူပဲလေ ။ ခွင့်လွှတ်ရမှာပေါ့ ။ ခွင့်လွှတ်ပါတယ် ။



"  သေရာပါ ဆိုတာ

ဘယ်နှစ်ကြိမ် ကုလားဖန်ထိုးချဦးတော့

တငွေ့ငွေ့ပဲမဟုတ်လား

အရာရာဟာ တငွေ့ငွေ့ပဲ

ကိုယ့်လက်ကြားက စီးကရက်လို

လှုပ်လှုပ်ရွရွ မြို့ပြကြီးလို

ကြပ်ကြပ်ထုတ်ထုတ် ညနေခင်းလို

သည်လမ်းထဲ

ဘယ်ငှက်တွေများအသက်ရှူရတာ ၀ခဲ့ဖူးလို့လဲ

ကိုယ့်အလွမ်းဟာ ထင်ရာစိုင်းခဲ့ "   


           အဲ့သည်ညနေက အပိုင်းပိုင်း အတစ်တစ် ပြိုကျလာပြီး တတ်သလောက် မှတ်သလောက်နဲ့

ဖုတ်ဖတ်ခါပြန်ထသွားတဲ့ ကောင်းကင်ကို မြင်လိုက်တယ် ။  မှိုင်းညို့ရီမှောင် လို့ ။ ပွန်းပေရိဆွေးလို့ ။

ဝမ်းနည်းလိုက်တာ ။ မှင်တက်  တစ်စို့ သွားရရုံကလွဲပြီး ငြင်းဆန်ခွင့်မရှိတဲ့အခါ

ကျွန်တော်လည်း  ပြန်လာချင်ပါတယ် မေမေ ။ ဒါပေမယ့် " တစ်နေ့နေ့တော့ " ဟာ

ကျကွဲသွားပြီ ။ ဒါကို ကံတရားလို့ခေါ်ကြသလား ။

စံပယ်တွေ ကံတရားအလျောက်  လွင့်စင်ကျလာတတ်ပါသလား ။



" သဗ္ဗေသတ္တာ ကမ္မသကာတရားမှာ

တီးမိခေါက်မိရုံသာရှိခဲ့တော့လည်း

အရာရာ တလိမ့်ခေါက်ကွေး ပြုတ်ကျကျန်ရစ်   "


         " မေ့နိုင်မှာပါ တဲ့ "  ထက်ပိုင်းဖြတ်ချသွားတဲ့ အဲ့သည်တောင်ပံလေးကိုတောင်

မေ့မေ့ပျောက်ပျောက် မထားရစ်နိုင်ခဲ့တာပါ ။  ကြွေကျပြီးသားပန်းမို့ ချေမွပစ်လိုက်ဖို့

ဝန်မလေးလေရော့သလား ။ တဖျတ်ဖျတ်ခါရင်း  နာနာကျင်ကျင်ပဲ  နွမ်းခြောက်ပေးလိုက်ရတဲ့

ပန်းကို   ကျေးဇူးပြုပြီး  အမြုံလို့တံဆိပ်မကပ်လိုက်ပါနဲ့ ။ မီးဝိုင်းခံထားရတဲ့ အတွေးဟာ

မီးပဲ  ထ ထတောက်ပါတယ် ။ ဖူးပွင့်ဝေစည်ခြင်းသည်သာ အလှတရားပေပဲလား ။

ဒီလိုဆို  ခေါင်ရမ်းတွေချည်း ဖူးပွင့်ခဲ့ရင် သိပ်ကောင်းမှာပဲ ။

 ကြေကြေကွဲကွဲ ရယ်မောမိတာတွေ သိပ်များလာတယ် ။



" ဘာကိုမှ မိမိရရဖမ်းဆုပ်ခွင့်မရသေးခင်

နှုတ်ဆက်လိုက်ပါတယ်

သွားလမ်းသာလို့ လာလမ်းဖြောင့်ပါစေ   "


          တကယ်တော့ ရွေးချယ်ခံလိုက်ရတယ်ဆိုပေမယ့် ကနဦးအစထိ ပြန်သွားကြည့်မယ်ဆို

ကျွန်တော် ရွေးချယ်ခုန်ဝင်ခဲ့တဲ့ မျဉ်းတွေပါပဲ ။ အရွေးချယ်ခံရဖို့ ရွေးချယ်ခဲ့ကြသလိုမျိုးပေါ့ ။

ရှိစေတော့ ။ ရှိပါစေတော့ ။ သွားလိုရာသွားပါ ငှက်ငယ်။  သင်လည်း လွတ်ရာကျွတ်ရာဆီ

ပျံသန်းချင်ရှာမှာပေါ့ ။ သံယောဇဉ်ဟာ ချုပ်နှောင်ဖို့သက်သက် ဖြစ်တည်လာခဲ့တာ မဟုတ်မှန်းတော့

တစ်နေ့ နားလည်နိုင်ပါစေကွယ် ။  ဒီလိုနဲ့ပဲ ကျေနပ်ပေးလိုက်ပါမယ် ။ စိတ်ချမ်းသာအောင်နေပါ ။

အဆင်ပြေနိုင်ပါစေ ။ ကိုယ်တော့ ကိုယ့်အသက်ကို မီးပြန်ညှိရင်း ရှူသွင်းမှုတ်ထုတ်

အနာမကျက်မယ့်ဆေးကိုသာ စိတ်လိုလက်ရ မှီဝဲလို့ " အတ္တသမံ ပေမံနတ္ထိ " အဆို ကို

ပုန်ကန်နေအုံးမယ် ။          ။



Monday, November 19, 2012

သတင်းစကား



ထွေထွေထူးထူးရယ်တော့မဟုတ်ပါဘူး

ဆောင်းအိပ်မက်အကျိုးအပျက်တွေ

မရိတ်သိမ်းဖြစ်သေးဘူးဆိုတဲ့ အကြောင်းပါ စံပယ် ။

ဗလောင်ဆူဝေနေတဲ့ ရင်ငွေ့နဲ့

သွေးအေးတယ်လို့

အမြဲတမ်းအထင်ခံနေရတဲ့ ကောင်

မှိုင်းညို့ရီမှောင်သွားရတဲ့ ဆောင်းမှာ

ပွဲတော်တွေ ဖွေရှာရင်း

ဘယ်နှစ်ကြိမ်မြောက်မှန်း မသိတာတွေ 


အသံတိတ် ရွာ ရွာကျ 

သည်လိုနှင့် ၊ သည်လိုနှင့်.....

အရှက်တကွဲ  သွေးပျက်သွားခဲ့ရတာတွေ 

ကြေကွဲရပုံများ

ခုတ်ဖြတ်ချခံရပြီးတဲ့အထိ

ကိုယ့်ကိုယ်ကို နတ်နေကိုင်းလို့ထင်နေတုန်း


ငါတို့ ငါ.တို့ ငါ..တို့ ငါ.........တို့

အော်သံဟာ


တဖြည်းဖြည်း တိမ်ကောပျောက်ကွယ်သွားခဲ့ရပြီပေါ့ 

နေ့တွေ ညတွေလည်း ညို့


လင်းငွေ့ဝေသီချင်စိတ်ကလေးကို


အလိုမတူဘဲ ခေါက်သိမ်းထားလိုက်ရပြီ ။ ခဲရာခဲဆစ် ။


ကိုယ့်ရဲ့ တီးတိုးသဖန်းပိုးထိုးဖော်လေးရေ

ကိုယ်နဲ့ဝေးဝေးမှာ


ပျော်နေပါတယ် သတင်းစကားများကြားတော့


မချိမဆန့်နဲ့ပဲ ပျော်နေလိုက်ရပြန်ပါတယ်ဆိုတဲ့ အကြောင်း  ။ 





Sunday, November 18, 2012

ယာမာဂူချီခင်ဆွေရီသို့ ( အောင်ဝေး )


ယာမာဂူချီခင်ဆွေရီသို့

"အိမ်ထောင်ရေးဆိုတာ
မိန်းမတကာရဲ့
မဟာစီးပွားရေးအလုပ်ပဲ"
ငါ့ရင်ထဲမှာ ကွဲကြေရတဲ့အခါ
"မမထား" ဝတ္ထုထဲမှာပါတဲ့
ဗန်းမော်တင်အောင်ရဲ့စကား
မင်းခံစားစေချင်မိတယ်။

မင်းနားလည်ဖို့ကိုလဲ
ငါ့မယ်အလိုရှိတယ်။

ဒါပေမဲ့
ကဗျာဆရာ
ငါ့အဖို့မှာတော့
ဒါဟာ တကယ့်အမှား
ဖြစ်ခဲ့ပြီ။

ခင်ဆွေရီ ရဲ့
ဒီမှာ
ငါဟာ ဘာကောင်လဲ
ရင်ထဲမောနွမ်း
မင်းမုန်းစတမ်းဆိုရင်လေ
ပန်းတွေ ကလဲ
ငါ့အဖို့မလှပဲနေလိမ့်မယ်။

ငှက်ကလေးတွေကလဲ
ငါ့လက်ထဲက
ခွဲထွက် ပျံပြေးသွားလိမ့်မယ်။

ဇော်ဂျီ ရဲ့
မောင်သစ်ဆင်းကဗျာတွေ
မင်းသုဝဏ်ရဲ့
မောင်ခွေးဖို့ကဗျာတွေ
မင်းမရှိတဲ့အခါ
ငါဘာလုပ်ရမလဲကွယ်။

တစ်ရံရောအခါ
မင်းနဲ့ငါ
ကိုယ်ပိုင် ကဗျာရွတ်ဆိုပွဲလေး
ဖိုနွေးရင်ခုံကြ
လရောင် မှုံပျပျနဲ့
ညထဲကအလွမ်း
ဒဂုန်တာရာ ရဲ့
"ငွေလှေပေါ်က အနမ်း"
ငြိမ်းချမ်းခဲ့ကြရာ
ရွေးမြစ်ပြာကြီးလဲ
မစီးဆင်းပဲနေတော့မယ်။

မိုးရေထဲမှာကျေးလက်ဟာချစ်စရာ
မင်းမရှိတဲ့အခါ
လယ်ယာမြေနိုးထ
အဖိုးအဘနဲ့
ရိုးအတဲ့သွေးချင်းသားချင်းတွေ
ဝေးရင်းခြားရင်း
စကားကင်းမဲ့
ကောက်သင်းနံ့မဲ့
သက်တံရောင်မဲ့
ဝါခေါင်ပျောက်ဆုံး
တန်ဆောင်မုန်းမဲ့
ထွန်တုံးပိတ်ပွဲမဲ့
ရိုးထဲကချောင်းကလေးလည်း
တေးမဆိုပဲနေမယ်။

မိုးမခတော
ရိုးအသောတဲ့
ဟောဟိုက
မိုးစိုစိုနဲ့
လဲလဲပြိုပြို
တဲအိုအိုလေးတွေ
တေးမဆိုပဲနေမယ်။

ကဗျာထဲမှာ ကာရန်ရှာညှိတဲ့အခါ
အနာဂတ်ဟာ
ငါဘယ်လိုပဲဖွဲ့ဖွဲ့
မင်းမုန်းတဲ့ရင်
ဖွဲ့စည်းမွှေးရီ
ဒီရေမြင့်သစ်
ဖြစ်မလာနိုင်ဘူး။

ခင်ဆွေရီရဲ့
နှင်းစီတဲ့ဆောင်း
တွဲဖက်ကျောင်းမှာ
ခေါင်းလောင်းထိုးသံ
ညိုးညိုးညံတွေ
ပြန်လို့များကြားယောင်
မုန်းဟန်ဆောင်ရင်
နေရောင်ကျဲကျဲ
ပန်းခင်းထဲမှာ
လွမ်းရဲဖို့
တို့ချစ်လာတာ
လမ်းခွဲဖို့ မှ မဟုတ်ပဲကွယ်။

မနက်ခင်းဆိုရင်
လယ်ကွင်းတွေမှာလည်း
သီချင်းတွေလှပနေမယ်။

မိုနေးရဲ့ ပန်းရောင်နှင်း
ဗန်ဂိုးရဲ့ နေကြာခင်း
မီးတွင်းမှာ
မင်းဝါဝင်းသလို
အလင်းရောင်စိုစိုနဲ့
အို
ဘာပြောကောင်းမလဲ
ငါ့ရင်ထဲ
နှင်းခဲရွှေရောင်
လွမ်းအောင်လှပ
အဲဒီရသ
ခုကဗျာရေးတဲ့ည
ပြန်လို့ရတယ် အချစ်ရယ်။

ကောက်ရိတ်ရင်း
စပါးနယ်ရင်း
တလင်းပြင်ရှေ့
ရင်ငွေ့လှုံနွေး
သံမဏိချွေးစက်
အိပ်မက်ပွင့်တွေ
ရင့်ဝေလို့ပဲမကြွေ
ဝေလို့ပဲမဆုံး
ရိုမန်တစ်အပြုံးတွေနဲ့
ဟိုတုန်းက
မင်းပြုံးခဲ့တာတွေ
ငါအမှတ်ရနေတယ်။

ကြားယောင်သေးရင်
မင်းနားထောင်နော်
"ပတ္တမြားရောင်ဝါ
ကံ့ကော်ဦးတွေနဲ့" တဲ့
"ခင်နဲ့သာအတူတွဲကာ
ဘယ်ကမ္ဘာရွေ့စေ
ဖုန်းမသွေပါ
မမုန်းလေနဲ့အချစ်ဦးညှာ"
ဘာဖြစ်လို့များ
ချစ်ပြီးမှ
လမ်းခွဲချင်ရတာလဲ
ဝမ်းနည်းစရာပါ
ခင်ဆွေရီ။

ပိတောင်ဦးတွေနဲ့
ငါမူးဝေတုန်း
တို့လယ်မြေရိုးပြတ်ကုန်းမှာ
မင်းမုန်းမှာငါစိုးခဲ့
ငါမုန်းမှာမင်းစိုးခဲ့
ဒါနဲ့များ
ခွဲသွားဖို့လမ်း
ရှာချင်စမ်းတာလဲ
ငါ့ရင်ထဲက ခင်ဆွေရီ။

လောကကမ်းပါးမှာ
ငြိမ်းချမ်းရေးပို
လွမ်းရေးချို
ခေတ်ကိုဖြတ်သန်းရမယ်လေ။

ကျေးလက်ဟာ
ငါ့ကဗျာရဲ့
ရာဇဝင်ရုပ်ပုံ
ရွေးမြစ်ပြင်လှိုင်းလှုပ်ခုန်
လွန်းတောင်ပေါ်ကမုတ်သုံ
အားလုံးဟာယုံတတ်ရင်
ရင်ခုန် လွတ်လပ်
ချစ်မြတ်စရာပါ။

ခင်ဆွေရီရဲ့
မင်းနဲ့ငါနဲ့
ဘဝရဲ့ ပထမခြေလှမ်း
မိုးစိုစိုနဲ့လှမ်းတော့
ရင်ဖိုဖိုနဲ့ ချမ်းခဲ့တာပဲ
ခရီးအလွမ်း
ကြမ်းခဲ့တာပဲမဟုတ်လား။

အဲဒီတုန်းက
ငါရွတ်ပြခဲ့တဲ့
မာယာကော့ဖ်စကီးရဲ့ ကဗျာ
မင်းအခုပြန်နားထောင်ပါ။

"ချစ်တတ်ဖို့ နှလုံးသားတစ်စုံရယ်
ရင်အခုန်မှန်စေဖို့
ကုန်ထုတ်လုပ်မယ့်လက်နှစ်ဖက်ရယ်
ဒီနှစ်ခုပြည့်စုံရင်
ငါတို့လက်ထပ်ကြပါစို့" တဲ့။

မှတ်မှတ်ရရ
ရွေးမြစ်ပေါ်က
ပဲ့ထောင်ပေါ်မှာ
မင်းကို ငါခေါ်လာခဲ့တာပဲ။

မိုးရေထဲက
ရဲရင့်ရတဲ့
ဇူလိုင်လ ၁၃ရက်
ဘဝစာမျက်နှာ
၁၉၈၁ မှာ။

ငါကျောင်းဆရာ
မင်းကျောင်းဆရာကတော်
အရပ်ကခေါ်ရင်
ငါလေမင်းကို
ပျော်စေချင်ခဲ့တယ်။

မင်းရင်ထဲမှာ
ဘယ်လိုရှိမလဲ
ငါဝေခွဲကြည့်
သံစဉ်ညှိရင်း
ချိုသင်းကြိုင်လှောက်
ခဲ့တယ်လေ။

ဒါပေမဲ့
ငါဝန်ခံပါတယ် ခင်ဆွေရီ။

၂၃ ဇူလိုင် ၁၉၈၄ မှာ
ငါအသက်သုံးဆယ်
ပြည့်တဲ့အခါ
"ရွေးမြစ်ကမ်းက
ငါ့မိန်းမခင်ဆွေရီ
ငါ့ဂီတဟာ
မလှသေးဘူးကွယ်" လို့
ငါရေးခဲ့သေးပါတယ်။

"ရင်ခုန်သံ နှစ်ကာလများ"
ဆိုတဲ့
အဲ့ဒီကဗျာ
လူငယ်တဦးရဲ့ အတ္တရုပ်ပုံလွှာ
မင်းပြန်ရှာဖတ်နော်
"ငါ့ဘဝဟာ
ငါ့သား လရောင်ဝေး
ကြီးလာရင်ကဗျာရေးဖို့
ရိုးဟေးငြာသံ
ဒါမှမဟုတ် ရစ်သမ်
စံဖြစ်ရမယ်"
ငါ့ရဲ့ရင်ကို
မင်းမြင်မှာလား
မယားအသက်နဲ့
အားတက်စရာ
သားဟာ
ဓားတစ်လက်ပါကွယ်။

တကယ်လည်း
ငါစွဲမြဲယုံကြည်
အမည် သညာ
ခေါ်စရာကား
မဟာ လရောင်ဝေး
တု့ရင်သွေးရဲ့
အရေးတော်ပုံ
မွေးနေ့ကြုံလာ
မယုံချင်စရာပါ။

အဲဒီနေ့ဟာ
ရုရှား မဟာအောက်တိုဘာ
တော်လှန်ရေး
၆၅ နှစ်ပြည့်
(၇ ရက်၊ ၁၁လ၊ ၈၂ ခုနှစ်)
ငါမမေ့
လွမ်း၍နေဆဲပါ
ယာမာဂူချီ ခင်ဆွေရီ။

ငါ့အတွေးနဲ့
ပေးတဲ့နာမည်
ဂျပန်ပြည်က
"တိတ်ခ်မီအဝေး"
ရင်ထဲဆွေးလို့
မွှေးတဲ့ နှင်းဆီ
ခင်ဆွေရီဟာ
"ယာမာဂူချီ ခင်ဆွေရီ" ဖြစ်
ဘာဖြစ်သလဲ
ရုပ်ရှင်ထဲက
မိုးမိုးအေးလှသလို
ငါ့ရင်ထဲက
မခင်ဆွေရီ(မြန်မာပြည်)လည်း
လှတာပါပဲ မိန်းမရယ်။

အလွမ်းတစ်စ
ငါ့ရင်ဝမှာ
လွင့်ရှထိမှန်
နာကျင်ပြန်ပြီ
မဒမ်အောင်ဝေး
သို့မဟုတ်
ခင်ဆွေရီ။

ခင်ဆွေရီရဲ့
ငါ့ဘဝကို ကဗျာဖွဲ့
ငါ့ရဲ့ ကဗျာမှာ
"ပြည်သူထဲက
ဆင်းရဲချိုမြိန်
အိပ်မက်မဟုတ်။
ကဗျာအလုပ်
မဟာရုပ်နဲ့
ကျွန်ပ်" လို့
ငါ သရုပ်ဖော်ခဲ့ပြီ။

အဲဒီကဗျာ
"အချိုမြိန်ဆုံး ငရဲ" ထဲမှာ
ငါ ဒီလိုခံစား
ငါ့ရဲ့သဘောထား
ခါးသီးပေမယ့်
ချိုမြခဲ့ပါပြီကွယ်။

"ဒုက္ခရှိမှ
ဘဝမြင့်မြတ်
လှပတတ်၏။
သိက္ခာမာန
အကျမခံ
ကံ
ကံ၏အလုပ်
ကျွန်ပ်မသိ"
မသိလို့လည်း
ငါဆင်းရဲနေတာပေါ့ကွယ်။

ငါဆင်းရဲလို့လည်း
မင်းလမ်းခွဲချင်တာပေါ့ကွယ်။

လမ်းမခွဲခင်ဝမ်းနည်းရင်လည်း
နည်းပါ
ငါရေးတဲ့စာ
ငါ့ကဗျာ
မင်းဖတ်ပါနော်။

ဘာပဲဖြစ်ဖြစ်
ငါ
မင်းကိုချစ်နေဦးမယ်။

တွယ်တာနေသမျှ
ငါ့ဘဝရဲ့
သုခတစ်ခြမ်း
မင်းယူစမ်းလေ
မင်းဘဝရဲ့
ဒုက္ခတစ်ခြမ်း
ငါ့ကိုကမ်းလေ
တစ်ခန်းမရပ်
အလွမ်းဇာတ်လည်း
ချစ်တတ်ရင် ချစ်စရာ
မောင်ခိုင်မာ ပြောသလို
"ပလူကောင်ကို
အိမ်မြှောင်ဆွဲသလိုပ
အပူရောင်
အိမ်ထောင်ထဲမှာ" နော်။

ယာမာဂူချီ
ဒီနာမည်
ပြည်သူထဲမှာ
ကဗျာဆရာ ပေးခဲ့ပြီ။

ကဗျာထဲမှာ
ငါရေးဖူးခဲ့
"နောင်လာမယ့်
နှစ်ဆယ့်တစ်ရာစုမှာ
အောင်ဝေး
လူဖြစ်သေးရင်
ကလေးတစ်ဒါဇင်
ခင်ဆွေရီ ကျမ်းစာတစ်အုပ်
အဘိုအိုကြီးရုပ်နဲ့" လို့
အဲဒီကဗျာ
၈၆ ဇန်နဝါရီ
ရုပ်ရှင်အောင်လံမှာ
မင်းပြန်ဖတ်ပါ။

အနာဂတ်မှာ
ငါဘာဖြစ်နေမလဲ
ငါမင်းကို
ဘယ်လိုသဘောထားမလဲ
မျိုးဆက်သစ်ကို
ငါဘယ်လို ပျိုးထောင်မလဲ
ငါဘယ်သူဆိုတာ
မင်းသိလာပါလိမ့်မယ်။

ပြန်ပြောပြရင်လည်း
သံယောဇဉ်ပဲ
ရင်ထဲက
ဆွဲထုတ်ရတော့မယ်။

"အောင်ဝေးခံစားမှုများ"
ဆိုပြီး ခပ်ပါးပါးကဗျာစာအုပ်
စာကူးစက်နဲ့ထုတ်တော့
ငါ့ရုပ်ပုံလွှာ
"မလင်းပြာ" ဆိုတဲ့
နာမည်နဲ့
မင်းရေးတဲ့အမှာ
ဒီလိုပါတယ်။
"သူ ကဗျာရေးရင်
သားမေ့မယားမေ့ပါ။
သူ့ကဗျာတွေဟာ
တစ်နှစ်လုံးနေမှ
မဂ္ဂဇင်းမှာ
သုံးလေးပုဒ်ပါဖို့
အနိုင်နိုင်ပါ။
ပါပြန်တော့လည်း
ကဗျာတစ်ပုဒ်မှ
စာမူခ
အစိတ်သုံးဆယ်
ဒီဇယ်ဖိုး
ရေနံဆီဖိုး
ကုန်ရတာနဲ့
မကာမိပါဘူး"
ငါတောင်းပန်ပါတယ်။
ယာမာဂူချီ ခင်ဆွေရီ။

မင်းရည်မှန်းတာကို
ငါ မရည်မှန်းနိုင်သေးနိုင်တာပဲ
ငါဝမ်းနည်းတယ်။
ငါယုံကြည်တာကို
မင်းမယုံကြည်နိုင်သေးတာလည်း
ငါဝမ်းနည်းတယ်။

ငါ့ရင်ထဲမှာ
ကဗျာ
ကဗျာထဲမှာ
ပြည်သူ
ပြည်သူထဲမှာ
မင်းလည်းပါတယ်။

ဒဂုန်တာရာဟာ
ငါ့ပြည်သူပဲ
လူထုဒေါ်အမာဟာ
ငါ့ပြည်သူပဲ။
ကြည်အောင် က စ
မောင်လင်းခက် အဆုံး
အားလုံးဟာ
ငါ့ပြည်သူပဲ။

ခင်ဆွေရီ
လရောင်ဝေး
နောင်သမီးလေးမွေးလို့
ကြည်အေး
နုနုရည်အင်းဝ
မွှေးကူးထုံရှ
သင်းမြခဲ့ရင်
လှတဲ့ "နှင်းဆီဝေး"
ဟာလည်း
ငါ့ရဲ့ ပြည်သူပါပဲ။

ပြည်သူရှေ့မှာ
ကဗျာဆရာ
အိမ်ထောင့်ဦးမှာ
ကဗျာဆရာ
ထပ်တူမကျတာတော့
မင်းခွင့်လွှတ်ပါ။

ရွာမှာတုန်းက
သင်ပုန်းဟောင်းနဲ့
ကျောင်းဆရာ
မြို့မှာနေတော့
မြေဖြူမကိုင်
'ပင်မရေစီး"
စာအုပ်ဆိုင်ထိုင်တဲ့
ခေတ်ပြိုင်ကဗျာဆရာ
ငါဟာငါပါပဲ။

ပထမေက်းလက္မွာ
တွဲဖက်ဆရာသုံးနှစ် (၁၉၇၉-၈၂)
နောက်တော့
ရန်ကုန်မှာ
မဟာဝိဇ္ဖာနွံနစ်
ကဗျာဆရာဖြစ်တဲ့ တစ်နှစ်
(၈၂-၈၃)
ပြီးတော့ တွဲဖက်ဆရာ
ကျေးလက်မှာ
ဒုတိယမ္ပိနှစ်နှစ် (၈၃-၈၅)
ခုတော့ မြောင်းမြမှာ
(၈၅-၈၆)
ထမြောက်စိမ်းမျစ်
ကဗျာနဲ့ပြန်ချစ်
မိန်းမနဲ့ရန်ဖြစ်
ဒါခေတ်ထဲက
ဆင်းရဲတဲ့ အိမ်ထောင်ရေးမှာ
လွတ်လပ်ကာရန်
ပုံသဏာန်အသစ်နဲ့
ကဗျာသစ်ပဲပေါ့ကွယ်။

ဆိတ်ဖလူးရနံ့ကို
လွန်မြောက်ပြီးတဲ့နောက်
နှစ်နှစ်က ချစ်သူဘဝ
ငါးနှစ်က
အိမ်ထောင်သည်ဘဝ
ဒုက္ခချိုမြ
လှပခဲ့ပြီ ခင်ဆွေရီ။

ဒီအချိန်မှာ
ငါဟာ
အိပ်မက်နေတာလား
ဆိုတော့လည်း
မယားရယ်
သားရယ်
စားဝတ်နေရေး
ရေးသုံးရေးပဲ
အတွေးထဲမှာ
စိုင်ခဲခဲ့တယ်။

လူမှန်ရင်
တာဝန်ကြီးနှစ်ခု
မျက်မှောက်ပြုရမယ်
တစ်ခု က ကုန်ထုတ်လုပ်ရေး
နောက်တစ်ခုက
မျိုးဆက်ပြန့်ပွားရေး
အဲဒီ အရေးထဲ
ငါလည်းခိုဝင်
ရင်ခုန်ခဲ့တယ်။

ဒါပေမယ့်ကွယ်
"တိုက်ကားမရလည်း
ဆိုက်ကားခ ရှိတဲ့အခါ
ဟင်္သာတ ပေတရာ
ပျော်စရာပါ" တဲ့
မောင်နွယ်ထွဋ်ရဲ့ ကဗျာကိုပဲ
ငါ ကိုးကားရတော့မယ်။

ကဗျာဆရာနဲ့
သူရဲ့ အိမ်ထောင်ရေးမှာ
ဆင်းရဲတာ ဆန်းသလား
သင်းကွဲတာ
ဆန်းသလားကွယ်။

ငါ့အဓိက
ဘဝ အလွမ်းအမောအမြင်
သရုပ်မှန်ရင်တော့
ခင်ဆွေရီ
နာခံရမယ်။

ဘဝက
အသိကိုပြဌာန်း
လူတန်းစားတူမှ
ခံယူချက်ညီ
ယုံကြည်ခြင်းမှာပဲ
နှင်းဆီပွင့်တယ်။

"အချစ်ရေ
မြေနဲ့ကောင်းကင်
မြင်နေသမျှ
အလှခေတ်ဦး
ဖူးသစ်လာမှာပါပဲကွယ်
ယုံပါ" တဲ့
မောင်လေးအောင်ရဲ့ ကဗျာ
ခုနေမှာ
ငါ ဒါပဲရွတ်ပြနိုင်သေးတယ်။

ငါတို့အိမ်ထောင်ရေး
မလှသေးလည်း
တို့တွေးစရာ
ဘယ်ကဗျာဆရာရဲ့
အိမ်ထောင်ရေးဟာကော
လှပါသလဲ။

ကဲ
ရင်ထဲပြေရှ
နွမ်းလျစဉ်းစား
အလွမ်းအားအင်
သစ်တော့ကွယ်။

ပုသိမ်မှာ မောင်အောင်ပွင့်
ဇနီး(ဒေါ်)နန်းညွှန့်ရွှေ
ရင်ဖြင့်ရင်းနှီး
ဘဝခရီးကြမ်း
ဆူးခင်းလမ်းမှာ
သား
"မောင်ကြီးငြိမ်းချမ်း" တဲ့
သမီး
"လုံမငြိမ်းချမ်း" တဲ့
မချမ်းသာပေမယ့်
လွမ်းစရာကွယ့်။

ယာမာဂူချီရဲ့
ဒီလိုပဲ
ခေတ်ပြိုင်ထဲမှာ
ကဗျာဆရာဆိုတာ။
ခံယူတတ်ရင်
ခံယူချင်စရာ
ရင်ထဲမှာ
ဘာပဲ ပူလောင်
အမှောင်ဖြစ်ဖြစ်
တစ်ခေတ်တစ်ခါ
ကဗျာတစ်ပုဒ်
စာတစ်ပုဒ်ပဲ
ရေးထုတ်လိုက်ရ
ရေးတဲ့ခဏမှာ
နှလုံးစိတ်ဝမ်း
ခဏငြိမ်းချမ်း
ရတာပဲမဟုတ်လား။

ပူတတ်ရင်လည်း
ပူစရာပဲလေ
ကျဉ်းထဲကျပ်ထဲ
ရှောင်လွှဲမရ
အိမ်လခ
ဆိုင်ခန်းခ
မီတာခ
ရှိသမျှတွေ
လကုန်ရင်
ရင်ထဲလောင်မြိုက်
မူးမိုက်ပြိုလဲ
သေပဲသွားမလား
စားစရာမရှိ
လျော်စရာရှိနဲ့
မရှိခြင်းတွေ
မြင်းရိုင်းငါးကောင်
မီးဖိုချောင်မှာ
ခြင်ထောင်ထဲမှာ
မည်းမည်းမြင်ရင်
ရန်သူထင်စရာ
တစ်ခါတစ်ခါ
ငါလည်း
စိတ်ညစ်ရတာပါပဲကွာ။

ခင်ဆွေရီမ ရဲ့
မင်း ဘဝက
မိန်းမ လည်း မိန်းမ
ကဗျာ့ဆရာ့ မယားလည်း ကဗျာဆရာ့မယား
ငယ်ဂုဏ်ကလည်းထွားတော့
ပူများပူရင်အမှန်ပဲ
ငါ ငြူစူချင်ခဲ့တယ်။

ဒါဟာ
ငါ့ရဲ့အမှား
ငါမှားပါတယ်ကွယ်ဆိုတော့
ဟော
မင်းငိုပြန်ပါပကော။

မင်းငိုရင် ငါချော့
ငါချော့ရင် မင်းမူ
မင်းမူတော့ ငါစ
ငါစလို့မင်းစိတ်ကောက်ရင်
ဟန်ဆောင်လို့ ငါအိပ်
မီးပိတ်တော့လည်း
ညည်းစိတ်လျော့ရတာပဲ
မဟုတ်လား။

ဒီလိုပဲလေ
မင်းပဲဖြစ်ဖြစ်
ငါပဲဖြစ်ဖြစ်
ခေတ်ပြိုင်ထဲမှာ
အဲဒီ အိမ်ထောင်မှု
ချစ်လို့ထုသွန်း
လွမ်းဖို့ထူထောင်
လဲပြိုရအောင်မှ မဟုတ်တာ။

ဒါနဲ့များ
တရားလမ်းလွဲ
အားစမ်းပွဲမှာ
လမ်းခွဲဖို့စကား
မင်းနှလုံးသားက
ပြောကြားချင်ရတာလဲကွယ်။

မင်းမှာ
ကောင်းကင်မရှိပေမယ့်
ငါ့မှာ
ကဗျာ
မြေလွှာရှိတယ်။

ငါ့ကဗျာဟာ
အနာဂတ်ကို
ဖွဲ့စပ်ကြိုရင်း
မင်းကိုလည်း
"ရဲဘော်
ရဲဘော်
ရဲဘော်" လို့
အော်ရင်းဟစ်ရင်း
စည်းရုံးရင်းနဲ့
လမင်းတစ်ရာ
ထိုနေရာကို
ပန်းပေါင်းတစ်ရာ
ထိုအခါကို
ရာဇဝင်နဲ့
အချစ်နဲ့
ခေတ်ရဲ့အမှန်တရား
အသစ်ဖွဲ့ခံစား
ခေါ်ဆောင်သွားလိမ့်မယ်။

ဘဝဆိုတာ
လှပစွာ
ဆင်းရဲတတ်ဖို့ပဲလိုတယ်။

နောင်အနာဂတ်မှာ
မင်းဟာ
မျိုးဆက်တစ်ဆက်ရဲ့ မိခင်
ဖြစ်ချင်လည်းဖြစ်မယ်။

ငါ့ရင်ထဲမှာတော့
မင်းဟာ
ယာမာဂူချီလို လှပ
အေးမြရုံနဲ့
လုံလောက်ပါတယ်ကွယ်။

မင်းရယ်
ငါရယ်
သားတွေသမီးတွေ
ဖွဲ့စည်းစိမ်းသင်း
ကြီးပြင်းလာတဲ့အခါ
မောင်သာနိုး ကဗျာဖွဲ့သလို
"မင်္ဂလာပါ နံနက်ခင်း" လို့
လာမယ့်နှစ်ဆယ့်တစ်ရာစု
ချစ်သူ အိပ်မက်နှုတ်ခမ်း
လက်ဆွဲနှုတ်ဆက်နမ်းရအောင်။

ချစ်တတ်ပြီး
သတ္တိရှိမယ်ဆိုရင်
အနာဂတ်ဟာ
ထာဝစဉ် ချိုမြနေမှာပါ။

ငြိမ်းချမ်းရေးသာ
ရမယ်ဆိုရင်
ရာဇဝင်မှာ
မိန်းမမြတ်မိခင်တွေဟာ
ကောင်းကင်တစ်ခြမ်း
ပခုံးထမ်းပြီး
လမ်းကြမ်းကြမ်းလည်း
လျှောက်လှမ်းနိုင်ပါသတဲ့
ကဲ
ဘယ့်နှယ့်လဲ
ငါ့ရင်ထဲက
မခင်ဆွေရီ (မြန်မာပြည်)။ ။

အောင်ဝေး
ပေဖူးလွှာ၊ ၁၉၈၆၊ ဇူလိုင်။


Thursday, November 15, 2012

ယနေ့ရာသီဥတုဟာ အရင်လိုပဲ ဝေလေလေ




အက်ရ်ှလေ!!!

ငါတော့မင့်လိုလေနေပြီ ။ သည်ရက်ပိုင်းအတွင်း ဘာမှမလုပ်ချင်ဘူး ။ ဆိုတော့ ဘာမှမလုပ်ဖြစ်ဘူး ။

ဆိုပေမယ့် ငါစကားတွေအများကြီးပြောဖြစ်တယ် ။

ဒီမိုကရေစီ ၊ ရွေးကောက်ပွဲ ၊ ဆန်ရှင် ၊ လူ့အခွင့်အရေး ၊ လူတန်းစေ့နေနိုင်ရေး ၊ သမ္မတကြီး ၊ NLD ၊

ကြံ့ဖွံ့ ၊ စသဖြင့် ဘာညာသာရကာတွေ ရေပက်မ၀င်အောင်ပြောဖြစ်တယ် ။

စိတ်ကူးပေါက်လာတာနဲ့ ငါ့အခြေခံဥပဒေကို ငါကိုယ်တိုင်ရေးကြည့်ဆွဲလိုက်တာ(စိတ်ကူးထဲမှာ)

ထင်သလောက် လှမလာဘူး ။ ကမောက်ကမ ။

ငါကငါမဟုတ်တဲ့သူတွေနဲ့အံမ၀င်ခဲ့ဘူး(ငါဆွဲတဲ့ငါ့အခြေခံဥပဒေထဲမှာ) ။

စိတ်ပျက်စွာနဲ့ပဲ အဲ့သည်စိတ်ကူးကို လုံးချေလွှင့်ပစ်ခဲ့တယ် ။

ဒါဟာ ငါ့ရဲ့အောင်မြင်မှုပေါ့လို့ ငါဝတ်တစ်စလစ်ကြွေးကြော်မိတာ မင်းသိရင် ရယ်မလား ။

မရယ်နဲ့ အက်ရ်ှလေ !!!

မင်းလည်းငါ့လို ရေးဆွဲကြည့်လေ ။ မင်းတစ်ယောက်တည်းရေးဆွဲမယ့် မင့်အတွက်

မင့်ရဲ့အခြေခံဥပဒေဟာလည်း မင်းမဟုတ်တဲ့ငါတို့နဲ့ ပနံသင့်လာမှာမဟုတ်ဘူး ။

အဲ့သည်အခါ မင်းလည်း မင့်ရဲ့စိတ်ကူးကို လုံးချေလွှင့်ပစ်နိုင်အောင်လေ့ကျင့်ထားပါ ။

ဒါဟာ ငါ့ရဲ့အောင်မြင်မှုပေါ့လို့ ၀တ်တစ်စလစ်ကြွေးကြော်ပါ ။ ငါ့လိုပဲ ။

ဟားဟားဟား ။

ရယ်ရတယ်မို့လား အက်ရ်ှလေ ။

ငါတို့ဟာ ရူးသွပ်မိုက်မဲလွန်းသူတွေပဲ ။

ငါတို့ဟာ မျက်စိတစ်ဆုံးရဲ့ဟိုဘက်မှာ ဘာတွေရှိနိုင်လဲ ဆိုတာ

သိစရာမလိုလောက်အောင်/မသိချင် လောက်အောင် ကျယ်ပြန့်ချင်လွန်းသူတွေဖြစ်ကြတယ် ။

ငါတို့ဆိုတာ ကိုယ့်အခြေခံဥပေဒေကို ကိုယ့်ဘာသာ ကိုယ့်တစ်ယောက်တည်းစီအတွက်

ရေးဆွဲမယ့်(တဲ့) မင်းနဲ့ငါ ပဲ ဖြစ်တယ် ။ ဟုတ်တယ်မို့လား ။ ရယ်ရတယ်မို့လား အက်ရ်ှလေ ။

သည်ရက်ပိုင်းအတွင်း စကားတွေအများကြီးပြောဖြစ်တယ် ။

ဆိုတာ သည်လောက်နဲ့မပြီးသေးတာတွေ ပါသေးတယ် ။

ရာသီဥတုက ဖေါက်ပြန်လာတယ် အက်ရ်ှလေ!!!

ဒါ ဟိုး လွန်ခဲ့တဲ့ ၂ နှစ် ၃ နှစ် ၄ နှစ် ကျော်ကျော်လောက်က(ကျော်ချင်သလောက်ကျော်ကြည့်)

ပြောဖူးတဲ့စကား ကြီးပဲ ။  ဘာဆန်းလဲ ။ လို့ မင်းထင်တယ်လား ။

ထင်ချင်သလိုသာထင် ၊ ပျော်သလိုသာ ထင်လိုက် အက်ရ်ှလေ !!!

မင်းသတိထားမိလား ။ သည်ရာသီ နွေ/နေ က အရင်ကလို ပူလောင်ရဆဲပဲ ။ ဗလောင်ဆူ ရဆဲ ။

ရင်ခွင်တိုင်းကိုမြင်ကြည့် ။ တွေ့ပလား ။ အပူငွေ့တွေ တရိပ်ရိပ် ၊ တတိတိ စိုးရိမ်အမှတ်မှာ

တက်ချည် ၊ မြင့်ချည် ။ ရာသီဥတုက အမှန်အကန်ဖေါက်ပြန်နေတယ် အက်ရ်ှလေ !!!

ငါတော့ နာဂစ် ၊ ဆူနာမီ ၊ ဟိုအရင်က အတိတ်တစ္ဆေတွေ ၊ ပြီးတော့ အဲ့တာ

အဲ့တာ တွေ ပြီးခဲ့ပြီထင်ထားတာတွေ  ကြောက်မိနေတုန်းပဲ ။ ဟိုအရင်တုန်းကလို ။

မီး   ဘေး   ရှောင်   မ   လောင်   ခင်   တား

ဟော သတိပေးချက်အသံတွေကြားပြီ ။ ကြားပြန်ပြီ ။ ကြားရပြန်ပြီ ။ ဟိုအရင်တုန်းကလို ။

ကြား/တား ရဦးမှာပဲ ။ အချိန်ကန့်သတ်ချက် ဘယ်လောက် ဘယ်လောက် မှ ဘယ်ရွေ့ ဘယ်မျှအထိ ။

အက်ရ်ှလေ!!!

ငါတော့သည်ရက်ပိုင်းအတွင်း စကားတွေအများကြီးပြောဖြစ်တယ် ။

ဆိုပေမယ့် ဘာမှမလုပ်ဖြစ်ဘူး ။ ဆိုတော့ ဘာမှမလုပ်ချင်ဘူး ။ ဝေလေလေ ။

အက်ရ်ှလေ!!!

မင်းကောငါ့လိုလေနေတုန်းပဲလား ။